నిఖిల్ 'స్వయంభు' షూటింగ్.. అడవిలో కొండపై చిక్కుకుపోయిన చిత్ర బృందం!

నిఖిల్ హీరోగా భరత్ కృష్ణమాచారి దర్శకత్వంలో రాబోతున్న చిత్రం 'స్వయంభు'. కాగా, ఈ సినిమా షూటింగ్ సమయంలో తమకు ఎదురైన ఒక భయానక అనుభవాన్ని దర్శకుడు భరత్ కృష్ణమాచారి పంచుకున్నారు. సినిమాలోని కీలక సన్నివేశాల చిత్రీకరణలో చిత్ర బృందం ఎదుర్కొన్న సవాళ్లను ఆయన మీడియాకు వివరించారు.

సినిమాలోని యాక్షన్ సన్నివేశాలను ఆంధ్రప్రదేశ్‌లోని రాజమండ్రికి సమీపంలో ఉన్న మారేడుమిల్లి అడవుల్లో చిత్రీకరించినట్లు భరత్ తెలిపారు. గతంలో 'పుష్ప' సినిమాలోని అటవీ సన్నివేశాలు చిత్రీకరించింది కూడా ఇదే ప్రాంతంలో కావడం గమనార్హం. అయితే, తాము మాత్రం ఇంతకుముందు ఎవరూ షూటింగ్ చేయని కొత్త ప్రదేశాలను ఎంచుకున్నామని ఆయన అన్నారు. ఆ ప్రాంతాలకు చేరుకోవడానికి జీపుల్లో రెండు నుంచి రెండున్నర గంటల సమయం పట్టేదని చెప్పారు. "ఒక షెడ్యూల్ సమయంలో అనుకోకుండా భారీ వర్షాలు పడటంతో, మా సిబ్బందిలో కొంతమంది దాదాపు ఒకటి రెండు రోజులు కొండపైనే చిక్కుకుపోయారు. వారు కిందికి వచ్చే మార్గంలేదు. వారి వద్ద కనీస సామాగ్రి కూడా లేదు" అని ఆ భయానక అనుభవాన్ని గుర్తుచేసుకున్నారు.

సినిమా నిర్మాణం కోసం ఏర్పాటు చేసిన భారీ సెట్ల వివరాలను కూడా ఆయన వెల్లడించారు. హైదరాబాద్‌లోని జన్వాడలో 6 నుంచి 8 ఎకరాల విస్తీర్ణంలో సుమారు 45 రోజులు శ్రమించి ఒక పూర్తిస్థాయి గ్రామం సెట్‌ను నిర్మించినట్లు తెలిపారు. ఇక సినిమా క్లైమాక్స్‌ను అన్నపూర్ణ స్టూడియోలో 70 నుంచి 80 రోజుల పాటు చిత్రీకరించినట్లు చెప్పారు. ఇందులో భాగంగా రెండు భారీ వంతెనల సెట్లను నిర్మించామని, వాటిలో ఒకటి కూల్చివేయడానికే ప్రత్యేకంగా తయారుచేశామని అన్నారు. ఈ బ్రిడ్జి దాదాపు 100 అడుగుల పొడవు ఉంటుందని పేర్కొన్నారు.

పిక్సెల్ స్టూడియోస్ పతాకంపై భువన్, శ్రీకర్ నిర్మిస్తున్న ఈ చిత్రం త్వరలోనే ప్రపంచవ్యాప్తంగా విడుదల కానుంది.